Завршната конференција на проектот „Универзитети без корупција во Албанија, Северна Македонија и Србија“ ќе се одржи на 27 август 2024 година во Белград. Овој значаен настан ја означува кулминацијата на напорите за поттикнување на транспарентноста и интегритетот во високообразовните институции во овие три земји.
Конференцијата, насловена „Достигнувања и иднина – создавање на универзитети без корупција“, ќе ги собере клучните чинители, вклучително претставниците на универзитетите, креаторите на политики, граѓански организации и студенти, за да разговараат за напредокот постигнат во текот на проектот и да дискутираат за иднината на образованието без корупција. Присутните ќе имаат можност да се вклучат во панел дискусиите како и да споделат сознанија и иновативни пристапи во борбата против корупцијата во академската средина.
Целосната програма на конференцијата која детално ја прикажува агендата, говорниците и панел сесиите, можете да ја преземете преку дадениот линк.
Настанот ќе послужи како значајна платформа за размена на знаење, соработка и промоција на најдобрите практики насочени кон обезбедување на интегритетот на образовните системи во регионот.
Како што се приближува крајот на проектот, конференцијата ќе претставува форум за споделување на достигнувањата, решавање на тековните предизвици и трасирање на патот кон создавањето на универзитети без корупција низ Западниот Балкан.

Проектот „Универзитети без корупција во Албанија, Северна Македонија и Србија“ е заеднички напор, поддржан од регионалниот грант на проектот СМАРТ БАЛКАН – Граѓанско општество за поврзан Западен Балкан. Оваа регионална иницијатива е имплементирана од Центарот за промоција на граѓански друштва (CPCD), Центарот за истражување и креирање политики (ЦИКП) и Институтот за демократија и медијација (IDM), со финансиска поддршка од норвешкото Министерство за надворешни работи (НМНР).